Integriteit
·         Ons sal in ons handelswyse te alle tye eerlik, regverdig en met integriteit optree.

·         Ons sal te alle tye daarna streef om kliënte en belangegroepe se vertroue in ons handelswyse te versterk.

·         Ons sal gepaste advies en oplossings bied om in ons kliëntbehoeftes te voorsien. 

Met dit in gedagte, sal ons ons weerhou van sekere produkte, verkoopstegnieke en advies wat ons as onwenslik beskou.

 Vertroulikheid
Ons belofte van vertroulikheid gaan hand aan hand met ons verbintenis tot integriteit. Om ons kliënte se vertroue waardig te wees, is dit belangrik dat ons optrede te alle tye van betroubaarheid, toegwydheid en eerbaarheid getuig.

·         Ons sal die vertroulikheid respekteer van inligting wat aan ons verskaf word en sal redelike maatreëls tref om te verseker dat die vertroulikheid nie geskend word nie.

·         Ons sal nie vertroulike inligting gebruik of openbaar maak behalwe in die normale gang van finansiële dienslewering nie, tensy die skriftelike toestemming van die verskaffer van die inligting vooraf verkry is, of tensy die openbaarmaking van die inligting in openbare belang is of deur die wet verplig word. 

Bevoegdheid en behoorlike sorg
Ons kliënte vertrou ons om hulle deur die ingewikkelde, steeds wisselende wêreld van finansies te lei. Dit is ons verantwoordelikheid om onsself voortdurend te verbeter sodat ons die mees vernuwende, praktiese, finansiële advies aan hulle kan verskaf.

·         Ons sal ons kennis en vaardighede voortdurend opskerp sodat ons bevoegde en gepaste advies aan ons kliënte kan lewer. Ons sal ons opleiding reg deur ons loopbaan voortsit om ons professionele bevoegdheid op al die gebiede waarin ons sake doen, te verbeter.

·         Ons sal voldoen aan die opleidingsvereistes wat deur die Finansiële Advies en Tussengangersdienste Wet vereis word.

·         Ons sal te alle tye advies verskaf wat binne die grense van ons kundigheid en bevoegdheid val. Waar die toepaslike advies of oplossing vir ‘n kliënt buite ons veld van deskundigheid is, sal ons ‘n persoon met die nodige kundigheid raadpleeg of betrek.

·         Gereeld ons kliënte se behoeftes te hersien en doelwitte voortdurend aan te pas om veranderende omstandighede te akkommodeer.

·         Te voldoen aan alle regulasies soos bepaal deur die Wette op die Finansiële Intelligensiesentrum, Finansiële Advies- en Tusengangersdienste en die Voorkoming van Georganiseerde Misdaad, asook enige ander relevante wetgewing wat van tyd tot tyd gepromulgeer word.

·         Te verseker dat ons die beste moontlike verhoudings ontwikkel tot die wedersydse voordeel van ons kliënte, hul families en al ons belanghebbendes.

Verskaffing van tersaaklike Inligting
·         Ons sal alle inligting aan ons kliënte bekend maak wat volgens wet vereis word of wat tersaaklik is vir kliënte om ‘n ingeligte besluit te kan neem.

·         Ons sal ons kliënte voor en na die opdrag of advies op hoogte hou van alle relevante en belangrike inligting.

 Onafhanklikheid
Ons kliënte weet dat -
·         wanneer ons tot ‘n mening of besluit kom, is onafhankliheid die eienskap  wat hom/haar in staat stel om onbevooroordeelde oordeel aan die dag te lê en objektiewe oorwegings toe te pas om die feite te staaf.

·         ten einde as onafhanklik erken te word, moet EMERALD PORTEFEULJE BESTUUR vry wees van enige verpligting teenoor, of belang in die kliënt, en die bestuur en eienaars daarvan.

·         besondere sorg word aan die dag gelê om toe te sien dat ‘n onafhanklike benadering tot enige opdrag nie in gevaar gestel word deur enige persoonlike of familiebande nie.

·         Ons weerhou ons van diskriminasie teen enige persoon op grond van ras, kleur, godsdiens, geslag, huwelikstatus, ouderdom of herkoms en met betrekking tot indiensneming, bevordering, afdanking, salaris, oorplasing, opleiding of ander praktyke in verband met werkverskaffing.

 Botsing van Belange
·         Waar ons rede het om te meen dat ons of ons werknemer(s) se betrokkenheid by ‘n opdrag moontlik ‘n botsing van belange kan veroorsaak, sal ons hierdie feit onmiddellik openbaar maak.

·         In gevalle waar daar duidelik ‘n wesenlike botsing van belange bestaan, sal ons dié feit onmiddellik aan ‘n kliënt of Produkverskaffer openbaar maak.